Athugið að skólanámskráin er í endurnýjun vegna mikilla breytinga.
Ágætu foreldrar
Um leið og við bjóðum barnið og ykkur hjartanlega velkomin í leikskólann Tjarnarsel, viljum við koma ýmsum upplýsingum til ykkar um starfsemina.
Efnisyfirlit
a. Tjarnarsel
1. Hagnýta upplýsingar
1.1 Opnunartími mætingar
1.2 Aðlögun
1.3 Leikskólamappa
1.4 Fatnaður
1.5 Matmálstímar
1.6 Svefn og hvíld
1.7 Afmæli
1.8 Slys og veikindi
1.9 Lyfjagjöf
1.10 Hver má koma með/ sækja barnið í leikskólann
1.11 Skipulagsdagur
1.12 Sumarfrí
1.13 Aðfangadagur og Gamalársdagur
2. Námskrá leikskólans
2.1 Hugmyndafræði/ Stefna
2.2 Áhersluþættir
2.2.1 Nám án aðgreiningar- sérkennsla
2.3 Hópastarf
2.4 Menning og samfélag
2.5 Umferðarfræðsla
2.6 Umhverfismennt/ Flokkur
2.7 Val /leikitími
2.8 Einingakubbar
2.9 Holkubbar
2.10 Myndsköpun
2.11 Verkefni fyrir elstu börnin - samskipti milli skólastigi
2.12 Sögur/ Tónlist
2.13 Tölva
2.14 Sumarstarfið
3. Ferðir
3.1 Ævintýravika og útskriftarferð
3.2 Sveitaferð
3.3 Námskrá
4. Hefðir og hátíðir
4.1. Pabba- og afadagur
4.2 Þorrablót
4.3 Aðventa
4.4 Bolludagur, sprengidagur og öskudagur
4.5 Mæðra- og ömmudagur
4.6 Útskriftahátíð
4.7 Sumarhátíð
4.8 Uppskeruhátíð
4.9 Dagur íslenskrar tungu
4.10 Leiksýningar
5. Dagskipulag leikskólans
6. Foreldrasamvinna
6.1 Foreldrafundur
6.2 Foreldraviðtöl
6.3 Fréttabréf
6.4 Upplýsingar um hópastarf
6.5 Dagatal leikskólans
7. Foreldrafélag Tjarnarsel
8. Lokaorð
Námskrá
a. Tjarnarsel
Leikskólinn Tjarnarsel hefur verið starfandi í fjóra áratugi en starfsemin hefur þróast og breyst í gegnum tíðina. Hann er staðsettur í hjarta bæjarins. Leikskólinn tók til starfa 18. ágúst 1967 og er elsti leikskólinn í Keflavík í Reykjanesbæ. Hann átti 40 ára starfsafmæli árið 2007.
Árið 1954 réðust kvenfélagskonur í Keflavík í að byggja dagheimili og félagsheimili sem þær nefndu Tjarnarlund. Var þetta fyrsta dagheimilið í Keflavík. Árið 1967 afhentu kvenfélagskonur Keflavíkurbæ lóð til eignar undir annan leikskóla sem nefndur var Tjarnarsel og hófst starfsemin þar 1967. Bærinn keypti síðan Tjarnarlund af kvenfélaginu árið 1983 undir rekstur leikskóla. Fram til ársins 2000 fór starfsemin fram í tveimur húsum. Árið 1999 var ráðist í að byggja tengibyggingu á milli húsanna og í dag fer öll starfsemi fram undir sama þaki.
Alls dvelja ca. 84 börn í leikskólanum á aldrinum 2-6 ára. Dvalartími barna getur verið frá fjórum til níu klukkustundir á dag eftir óskum og aðstöðu foreldra.
Leikskólanum er skipt upp í þrjú svæði og fjórar deildir
Tjarnarsel (neðra húsið) – Tengibygging– (efra húsið) Tjarnarlundur
- Mánavellir. Deild 2ja ára barna í Tjarnarselshúsi
- Sólvellir. Deild 3ja ára barna í Tjarnarselshúsi
- Ljósvellir. Deild 4ra ára barna í Tjarnarlundi
- Sunnuvellir. Deild 5ára barna í Tjarnarlundi
- Miðvellir. Tengibygging með fjölnota sal og skrifstofa leikskóla- og aðstoðarleikskólastjóra
- Garðavellir. Eldhús og aðstaða starfsmanna í Tjarnarselshúsi.
1. Hagnýtar upplýsingar
1.1 Opnunartími mætingar
Leikskólinn er opinn frá kl. 07:30 og lokar kl.17:15. Foreldrar gera skriflegan samning um dvalartíma barnsins sem við viljum biðja þá að virða. Ef foreldrar óska eftir að breyta út af honum hafa þeir samband við deildarstjóra. Til að barnið njóti allra þátta í menntun og uppeldi leikskólans, hefur reynslan sýnt okkur að barn sem mætir vel og reglulega verður fljótt öruggt í leikskólanum og unir sér vel. Ef barnið veikist eða er í fríi þá ber foreldrum að láta okkur vita.
Nauðsynlegt er að foreldrar láti leikskólakennara viðkomandi deilda vita þegar komið er með barnið og það sótt.
1.2 AÐLÖGUN
Að byrja í leikskóla er ný reynsla fyrir barnið og jafnvel foreldra. Allt er framandi og ókunnugt og því er mikilvægt að foreldrar og starfsfólk gefi sér góðan tíma í aðlögunina. Það getur haft áhrif á líðan barnsins í leikskólanum fyrstu vikur og mánuði. Við hvetjum foreldra til að nýta sér aðlögunina til að kynnast starfsfólki, börnum og daglegu lífi þeirra. Áætlaður aðlögunartími er yfirleitt ein vika. Deildarstjórar í samráði við foreldra ákveða hvernig aðlöguninni er háttað. Fyrstu dagana er æskilegt að foreldrar séu með barninu til að veita því öryggi.
1.3 LEIKSKÓLAMAPPA
Fyrsta dag barnsins í leikskólanum biðjum við foreldra að koma með möppu, útbúna með mynd af barninu, fjölskyldunni og öðru sem því er kært. Einnig biðjum við foreldra að rita í stórum dráttum fyrstu æviár barnsins. Leikskólakennarar viðkomandi deilda halda síðan utan um hana, leggja til myndir og skrá frásagnir og athafnir barnanna. Möppurnar verða geymdar þar sem börn og foreldrar geta nálgast þær til að skoða og lesa.
1.4 Fatnaður
Klæðnaður skal alltaf vera í samræmi við veðurfar og merktur barninu. Barnið þarf að vera í þannig fatnaði að það geti tekið þátt í öllu starfi sem fram fer í leikskólanum s.s. málingavinnu eða útivinnu. Nauðsynlegt er að börnin hafi alltaf með sér aukafatnað sem tekur mið af breytilegu veðri og ef einhver óhöpp eiga sér stað.
Ekki er tekin ábyrgð á fatnaði barnanna!
1.5 Matmálstímar
Áhersla er lögð á að börnin fái hollan, góðan og fjölbreyttan mat í leikskólanum og læri góða borðsiði. Leikskólinn býður upp á morgunmat, heitan hádegisverð, síðdegishressingu og ávaxtatíma í lok dags.
Fyrir morgunmatinn og síðdegishressingu eru börnin búin að velja sér leiksvæði og jafnvel komin í leik. Þeim er síðan boðið að borða þegar þeirra tími er komin til taka sér hvíld frá leik. Hádegismatinn borða börnin í tveimur hópum, kl. 11:30 og kl. 12:00. Daglega eru valdir aðstoðarmenn sem aðstoða leikskólakennarann við að leggja á borðin og bjóða félögum sínum til borðs. Lögð er áhersla á að æfa börnin í að skammta sér sjálf á diskinn sinn, hella í glösin og smyrja brauð sitt. Leikskólakennarar borða með börnunum og leggja áherslu á rólegar og notalegar samræður. Þau ganga frá eftir matinn með því að setja matarleifarnar í safnpoka sem fer síðan í jarðvegsgáminn sem staðsettur er á útileiksvæðinu. Við fataherbergi leikskólans er upplýsingatafla um matseðil dagsins/vikunnar, einnig er hann inni á vefsíðu skólans.
1.6 Svefn og hvíld
Eftir hádegismatinn hvíla börnin sig. Við skiptum hvíldinni á hverri deild upp í litla hópa. Á yngri deildunum (Mána- og Sólvöllum) leggja börnin sig í smá tíma eða lesin er saga og höfð róleg stund. Á eldri deildunum (Ljós- og Sunnuvöllum) er boðið upp á mismunandi tilboð í hvíldinni s.s. körfuval (litlar körfur með smádóti í), hlusta á framhaldssögu og geisladiska.
1.7 Afmæli
Haldið er upp á afmæli barnanna í leikskólanum. Afmælisbarnið er í brennidepli þennan dag, fær kórónu og félagarnir syngja fyrir það. Við reynum að gera afmælisdaginn sem eftirminnilegastan fyrir alla. Börnin mega hafa með sér frost- eða íspinna að heiman.
1.8 Slys og veikindi
Í stórum barnahópi geta alltaf komið fyrir slys eða óhöpp. Ef barn verður fyrir slysi er strax haft samband við foreldra. Náist ekki í þá er farið með barnið beint á slysastofu. Börn í leikskólum Reykjanesbæjar eru slysatryggð á meðan þau dvelja í skólanum.
Veikindi barna. Foreldrar skulu varast að koma með barnið ef það er að veikjast eða veikt, því þá er smithættan mest. Ef barn veikist í leikskólanum er foreldrum gert viðvart og hlúð að barninu þar til foreldrar sækja það.
Eftir veikindi barna. Þegar barn hefur náð sér að fullu eftir veikindi og foreldrar treysta því til að taka þátt í starfi og leik, geta foreldrar í samráði við deildarstjóra óskað eftir að barnið fari ekki í útiveru.
1.9 Lyfjagjöf
Æskilegt er að foreldrar hagi lyfjagjöf barna sinna þannig að leikskólinn þurfi ekki að bera ábyrgð á henni. Ef ekki verður hjá því komist skulu foreldrar fylla út staðlað form skólans um lyfjagjöfina.
1.10 Hver má koma með/sækja barnið í leikskólann
Í fyrsta viðtali er skráð niður eftir foreldrum hverjir mega sækja barnið. Ef aðrir en þeir eiga að sækja það skulu foreldrar gefa munnlegt leyfi fyrir því. Ef einhver annar kemur og ætlar að sækja barn án leyfis foreldra er hringt í þá og leitað upplýsinga. Aldrei skal afhenda barn, aðila sem virðist undir áhrifum lyfja eða áfengis. Ekki er æskilegt að börn undir 12 ára aldri komi með eða sæki barnið.
1.11 Skipulagsdagar
Starfsfólk leikskólans á rétt á fjórum skipulagsdögum á ári og er þá leikskólanum lokað. Þessir dagar eru nýttir til faglegrar samvinnu og endurskipulagningar. Foreldrum er tilkynnt um þessa daga með mánaðar fyrirvara.
1.12 Sumarfrí
Leikskólanum er lokað vegna sumarleyfa í 24 virka daga yfir sumarmánuðina. Sumarfríið er auglýst í fréttabréfi leikskólans og inni á deildum barnanna. Fríin eru breytileg milli ára.
1.13 Aðfangadagur og Gamlársdagur
Leikskólinn er lokaður á aðfangadag og gamlársdag.
2. Námskrá leikskólans
Einkunnarorð leikskólans eru:
hreyfing - lífsgleði - upplifun - virðing
Með lögum frá 1991 var leikskólinn gerður að fyrsta skólastigi barnsins.
Samkvæmt Aðalnámskrá leikskóla sem gefin var út 1. júlí 1999 af Menntamálaráðuneytinu beri leikskólum að semja skólanámskrá þar sem gerð er uppeldis- og námsáætlun til lengri eða skemmri tíma. Námsvið hennar eru: málrækt, hreyfing, náttúra og umhverfi, menning og samfélag, myndsköpun, tónlist og tölva. Námssviðin eru samofin áhersluþáttum leikskólans sem eru; vettvangsferðir um nánasta umhverfi leikskólans, leiktilboð með opinn efnivið s.s. kubba í öllum stærðum og gerðum og umhverfismál.
2.1 Hugmyndafræði/stefna
Lífsýn okkar starfmanna hefur óneitanlega haft áhrif á þá hugmyndfræði sem hefur þróast í leikskólanum síðustu árin, sem lýsir sér m.a. í útivist, hreyfingu og umhverfismálum. Auk þess teljum við að undirstaða starfsins í leikskólanum byggist á því að barninu líði vel og eigi gleðiríkar stundir. Við leggjum áherslu á að sýna barninu ástúð, hlýju og virða tilfinningar þeirra með því að koma fram við þau eins og við viljum að komið sé fram við okkur.
Leikur barna er undirstaða námsviða leikskólans í gegnum hann læra þau, þroskast og þjálfa hæfileika sína best. Skipulag og búnaður leikskóla á að örva leik barna, frumkvæði þeirra og virkni.
Deildirnar eru aldursskiptar í 2ja, 3ja, 4ra og 5 ára deildir og um sumarfrí ár hvert færast öll börnin í einu ásamt starfsfólki yfir á næstu aldursdeild.
Loka markmið leikskólagöngunnar er að útskrifa sjálfstæðan, öruggan og gagnrýninn einstakling sem ber virðingu fyrir sjálfum sér, náunganum og umhverfi sínu.
2.2 Áhersluþættir
Til að fylgja hugmyndastefnu og áhersluþáttum leikskólans eftir, höfum við valið þá leið að bjóða börnunum upp á fasta hópastarfstíma 4x í viku og ákveðin leiktilboð á valtíma fyrir og eftir hádegi í samræmi við þroska þeirra. Megin áhersla er lögð á vettvangsferðir um bæjarfélagið sem styrkir þau til að þekkja, virða og þykja vænt um nánasta umhverfi sitt. Einnig leggjum við áherslu á leik og nám í gegnum kubba í öllum stærðum og gerðum sem gefa börnum möguleika á að upplifa og skapa það sem hugurinn stefnir. Auk þess er boðið upp á óhefðbundið leikefni í könnunarleiknum fyrir yngstu börnin (sjá kafla 2.3 hópastarfið)
2.2.1. NÁM ÁN AÐGREININGAR - SÉRKENNSLA
Að jafnaði eru nokkur börn með sérþarfir í Tjarnarseli sem taka ber tillit til. Samkvæmt lögum eiga þau börn sem þurfa á sérstakri aðstoð eða þjálfun að halda rétt á henni innan leikskólans. Þar fer hún fram undir handleiðslu stuðningsfólks, þroskaþjálfa eða annarra sérfræðinga.
Rannsóknir benda til þess að virk þátttaka í heilbrigðum og samstilltum barnahópi veiti fötluðum börnum einhverja bestu þroskakosti sem völ er á.
Stuðningsaðilinn gerir einstaklingsnámskrá þar sem þjálfunarnám er sett upp eftir fötlun sérhvers einstaklings. Jafnan er unnið náið í samvinnu við Sérkennslufulltrúa á Fræðsluskrifstofu Reykjanesbæjar sem reglulega heldur fundi og stendur fyrir fræðslu fyrir stuðningsaðila.
2.3 Hópastarf
Þegar tveggja ára gamalt barn byrjar í leikskólanum fer það í hóp með jafnöldrum sínum sem einnig eru að hefja leikskólagöngu sína. Farið er hægt af stað í hópastarfinu með yngstu hópana. Leikskólakennarinn þarf að kynnast börnunum í hópnum og börnin kennaranum og hvert öðru. Einnig er lögð áhersla á að þau kynnist leikskólanum. Fyrstu mánuðina kynnast börnin nánasta umhverfi leikskólans bæði innandyra sem utan. Húsnæði leikskólans er skoðað hátt og lágt. Hvað leynist bak við luktar dyr? Hvað er allt þetta fólk að gera? Skólalóðin er skoðuð og notuð til leikja og rannsókna. Í vettvangsferðum innan leikskólans er bakpokinn góði hafður með og góður tími gefinn til að borða nestið. Börnin læra þannig að bakpokinn er sameign hópsins. Þegar leikskólakennarinn og hópurinn eru tilbúin, er hægt að leggja af stað út fyrir leikskólann.
Hópastarf er fjórum sinnum í viku, frá mánudegi til fimmtudags, ca. eina klst. í senn (sjaldnar þó hjá yngstu börnunum). Þar er börnunum skipt niður í hópa og hefur hver hópur sinn fasta hópstjóra sem ber ábyrgð á öllu skipulögðu starfi innan hópsins. Foreldrar fá afhentar starfsáætlanir sem deildarstjórarnir útbúa fyrir haust- og vorönn.
Í könnunarleik er yngri börnum boðið upp á ólíka verðlausa hluti og efnivið sem þau leika sér með án afskipta fullorðinna í stuttan tíma á skipulögðu afmörkuðu svæði. Þó er leikskólakennarinn ætíð til staðar og skiptir sér ekki af leik barnanna nema nauðsyn beri til, þ.e. ef barn fer til dæmis að henda hlutum og trufla hin börnin.
Eins og nafnið bendir til kanna börnin möguleika hlutanna og þau gera það upp á eigin spýtur.
Markmiðið með hópastarfinu er að gera uppeldisstarfið markvissara og gefa börnum tækifæri á að kynnast og uppgötva sitt nánasta umhverfi. Einnig gefst betra tækifæri til að sinna hverjum einstaklingi fyrir sig innan hópsins. Það er auðveldara að skapa samkennd meðal barnanna í litlum hópi. Þau finna til öryggis að vita að þau tilheyra alltaf sama hópnum og eru með sama hópstjóra.
2.4.Menning og samfélag
Í Tjarnarseli er mikið lagt upp úr því að fara með börnin í vettvangsferðir í hópastarfinu þar sem börnin kynnast nánasta umhverfi sínu. Leikskólinn er vel staðsettur hvað varðar marga áhugaverða skoðunarstaði: Vatnsholtið, skrúðgarðurinn, minnismerki sjómanna, Nónvarðan, Myllubakkaskóli, Duustúnið/svæðið, smábátahöfnin og gamli bærinn.
Í vettvangsferðum er hvert fótspor óþrjótandi uppspretta fjölbreyttar hreyfingar, uppgötvunar og leikja fyrir börn og starfsfólk.
2.5 Umferðarfræðsla
Í vettvangsferðunum hópanna um bæjarfélagið gefst börnum tækifæri að æfa sig á öllum almennum umferðarreglum hins gangandi vegfaranda. Svæðið sem börnin fara um stækkar eftir því sem þau eldast og þáttur umferðarfræðslunnar verður sífellt stærri.
2.6. Umhverfismennt/flokkun
Haustið´95 byrjuðum við að flokka pappír. Til að byrja með var einungis flokkaður afgangspappír frá deildunum. Veturinn ´97 var síðan farið í að flokka mjólkurfernur. Einnig eru ílát inná öllum deildum undir lífrænan úrgang sem síðan er farið með í jarðvegsgáma sem staðsettir eru á útileiksvæði. Í skapandi starfi með börnunum höfum við nýtt umbúðir frá matvælum og öðru sem til fellur. Kertaafgangar hafa farið í endurvinnslu eða börnin búið til ný kerti úr afgöngunum.
Markmiðið er að börnin séu meðvituð um endurnýtingu og þau áhrif sem við getum haft á umhverfi okkar með því.
2.7. Val/leiktími
Val/leiktími er alla daga vikunnar fyrir og eftir hádegi. Leiksvæðinu er skipt upp í sex til átta svæði sem eru sameiginleg á deildunum, Sunnu- og Ljósvöllum og Sól- og Mánavöllum. Valið byrjar alltaf á valfundi þar sem hvert barn velur sér leiksvæði og endar með tiltekt.
Markmiðið með vali er að efla sem flesta þroskaþætti barnsins ásamt því að vinna með einfaldan efnivið sem hvetur börnin til sköpunar, ímyndunar- og hlutverkaleikja. Efniviðurinn er t.d. leir, kubbar, pappír, lím, skæri ,litir, teppi, slæður og koddar svo eitthvað sé nefnt.
2.8 Einingakubbar
Einingakubba er unnið með í vali og hluta til í hópastarfi. Kubbarnir eru úr tré, af mörgum stærðum og gerðum. Þeir bjóða upp á óendanlega möguleika í byggingum og eru námsþættir þeirra margir. Ákveðin hugmyndafræði býr að baki starfinu með kubbunum sem leikskólakennarar starfa eftir.
2.9 Holkubbar
Leikur með holkubba er aðallega unnið í vali og eru þeir í boði fyrir eldri árgangana. Kubbarnir eru úr tré, stórir og holir að innan. Þeir eru í þremur mismunandi stærðum ásamt tréfjölum. Holkubbar líkt og einingakubbar bjóða upp á óendanlega möguleika í byggingaleik.
Markmið er fyrst og fremst að veita börnunum ánægju og möguleika til sköpunar. Kubbarnir bjóða börnunum upp á að leita lausna og prófa sig áfram á eigin forsendum. Það reynir á samvinnu þegar byggt er með öðrum og börnin þurfa að deila bæði efnivið og rými. Reynt er að gera tiltekt sem ánægjulegasta, þar læra börnin að ganga frá eftir sig og hafa gaman af.
2.10 Myndsköpun
Einn af mikilvægum áhersluþáttum í leikskólastarfinu er myndsköpun barnsins sem byggist á skynjun þess og reynslu. Leikskólakennarar leggja áhersla á að barnið fái að tjá sig frjálst í myndsköpun og nota fjölbreytilegan efnivið og áhöld. Það sem skiptir máli er augnablikið og vinnan sem barnið leggur í verkið en ekki útkoman.
2.11 Verkefni fyrir elstu börnin - SAMSKIPTI MILLI SKÓLASTIGA -
Á síðasta ári barnsins í leikskólanum leggjum við áherslu á ýmis verkefni sem tengja og styrkja þá miklu breytinga sem verður í lífi hvers barns þegar það flytur á milli skólastiga. Lögð er áhersla á gagnkvæmar heimsóknir í grunnskólana fyrir elstu börnin og þannig brúa bilið milli skólastiga. Stuðst er við námsefnið; markviss málörvun, og ótrúleg eru ævintýrin.
Markmið er að kynna skólareglur, orð og hugtök sem tengjast bæði lestrar- og ritmáli. Leikurinn er sú leið sem farin er til að ná markmiðinu. Lögð er áhersla á að eiga saman skemmtilegar og fræðandi stundir.
2.12 Söngur / Tónlist
Söngur er stór þáttur í lífi leikskólabarna og það er verið að syngja á öllum stundum dagsins. Við erum með söngstundir í salnum einu sinni í viku, á föstudögum. Þá hittast börn af öllum deildum og taka lagið saman. Einnig er mikið hlustað á tónlist af geisladiskum.
2.13 Tölva
Á öllum deildum nema á Mánavöllum er tölva sem börnin hafa aðgang að á valtíma. Leikskólakennarar velja forritin sem eru þroskandi, fræðandi og bjóða upp á marga möguleika til skapandi hugsunar.
Markmiðið er m.a. að styrkja barn og jafna stöðu barna sem ekki hafa aðgang að tölvu heima við. Einnig nýtist hún til að þjálfa börn með þroskafrávik.
2.14 Sumarstarfið
Skipulag á starfseminni yfir sumarmánuðina er með sama hætti og yfir vetrarmánuðina nema hvað útivera er aukin til muna. Valið færist mikið til á útileiksvæðið, þar sem spennandi möguleikar eru í boði fyrir börnin t.d. að mála með vatni, kríta, sópa, fara í fót- og körfubolta og leika með vatn í sandkassanum. Fyrir þau börn sem velja innisvæði eru sömu valmöguleikar í boði og eru yfir vetrarmánuðina.
Sumarhópastarfið er nýtt til þess fara í vettvangsferðir, farið er í leiki, náttúruskoðun o.fl. Börnunum er skipt í hópa eftir aldri.
3. Ferðir
3.1 Ævintýravika og útskriftarferð
Á vorin skipuleggja leikskólakennarar fjögurra daga óvissuferðir fyrir elstu börnin. Þetta eru dagsferðir þar sem áhugaverðir staðir á Suðurnesjum eru heimsóttir. Einn daginn er farið með hópana saman í útskriftarferð, þá er farið að morgni og komið heim um eftirmiðdaginn. Undanfarin fjögur ár höfum við farið í útskriftarferðina með vinaleikskólanum okkar Arnarsmára í Kópavogi
3.2 Sveitaferð
Annað hvert ár hefur foreldrafélagið farið með börnin í sveitaferð. Undanfarin ár hefur verið farið að Grjóteyri í Kjósarhreppi. Þar er öll aðstaða til fyrirmyndar. Börnin fá að skoða og snerta algengustu húsdýrin. Þar er grillað og borðað úti ef veður leyfir.
3.3 Námskrá
Til að brúa bilið á milli leik- og grunnskóla heimsækja elstu börnin í leikskólanum, sinn hverfisskóla.
4. Hefðir og hátíðir
4.1. Pabba- og afadagur
Á bóndadegi í upphafi þorra er öllum pöbbum og öfum nemendanna boðið í morgunmat í leikskólann. Boðið er upp á þorramat með öllu tilheyrandi.
4.2 Þorrablót
Þá er börnunum boðið að smakka hefðbundinn þorramat sem er borinn fram í trogi. Rætt um gamla tíma og gamlir munir skoðaðir. Einnig eru farnar vettvangsferðir í Byggðasafnið og Stekkjarkot.
4.3 Aðventan
- a) Litlu jólin
Þá koma saman tvær deildir í senn og börnin dansa í kringum jólatréð og oftast koma góðir gestir í heimsókn.
- b) Fjölskyldudagar.
Á aðventunni er foreldrum boðið í Kirkjulund þar sem elstu nemendur skólans flytja helgileik og nemendur Ljós- og Sólvalla flytja vísur eða syngja jólalög. Einnig er boðið upp á kaffi og piparkökur í boði skólans. Mánavallanemar bjóða sínum foreldrum til sín í leikskólans þar sem skemmtun fer fram í sal og einnig er boðið upp á kaffi og piparkökur.
- c) Kirkjuferð
Fyrir jólin er börnunum boðið í kirkju. Þar tekur prestur á móti þeim og spjallar við þau um jólahaldið. Einnig eru sungin saman jólalög við undirleik organista.
4.4 Bolludagur, sprengidagur og öskudagur
Á bolludag fá öll börnin rjómabollu og fiskbollur í hádeginu. Á sprengidag er boðið upp á saltkjöt og baunir í hádeginu. Á öskudag klæðast þeir sem vilja „furðufötum”. Tvær og tvær deildir koma saman og gera sér glaðan dag, slá góðgæti úr kassa, syngja og dansa.
4.5. Mæðra- og ömmudagur
Í tilefni mæðradags í byrjun maí ár hvert er öllum mæðrum og ömmum nemanna boðið í morgunverð í leikskólanum.
4.6. Útskriftarhátíð
Formlega er haldið upp á útskrift leikskólabarna með lautarferð í lok maí. Hún fer fram í anda hugmyndastefnu leikskólans, í trjálundinum upp á Vatnsholti. Leikskólinn tók Lundinn í fóstur árið 1997 og hefur hlúð að honum síðan. Gestir, börn og leikskólakennarar reita frá trjánum og gefa áburð. Síðan er boðið upp á léttan hádegisverð. Eftir veitingarnar og fyrir og eftir útskrift flytja börnin nokkur sönglög.
4.7. Sumarhátíð
Í maí/júní fögnum við sumrinu saman með því að fara í leiki, horfa á skemmtiatriði barnanna og grilla saman. Foreldrum er boðið að taka þátt í hátíðarhöldunum með okkur.
4.8. Uppskeruhátíð
Uppskerulok er fagnað í söngstund í september. Þá býður elsti árgangurinn upp á söng, dans og restina af uppskerunni sem þau settu niður í skólagarðana í júní.
4.9. Dagur íslenskrar tungu
Formlega er haldið upp á dag íslenskrar tungu 16. nóvember ár hvert. Elstu árgangar leikskóla Reykjanesbæjar bjóða fjölskyldum sínum og öðrum bæjarbúum upp á skemmtidagskrá í Frumleikhúsinu annað hvert ár.
Einnig er haldið upp á daginn í leikskólanum. Leikskólakennarar setja upp leiksýningu fyrir börnin á Miðvöllum (salur).
4.10. Leiksýningar
Árlega eru keyptar leiksýningar í skólann í samvinnu við foreldrafélagið.
5. Dagskipulag leikskólans
Utan um leikskólastarfið er útbúið dagskipulag sem tekur mið af þörfum barnsins og starfsmönnum leikskólans. Dagskipulagið er rammi til að halda utan um daginn. Þegar allir vita hvað og hvernig dagurinn líður, myndast visst öryggi sem leiðir af sér ánægju.
7:30-08:00 Leikskólinn opnar.
08:00-08:45 Morgunverður.
08:45-11:30 Nám og leikur (inni-úti).
11:30-12:30 Hádegisverður og hvíld.
12:30-14:45 Nám og leikur (inni-úti).
14:45-15:15 Síðdegishressing.
15:30-17:00 Nám og leikur (inni-úti).
17:15 Leikskólinn lokar.
Upplýsingar um nánari útfærslu af stundaskrá geta foreldrar fengið á viðkomandi deild.
6. Foreldrasamvinna
Þar sem barnið ykkar kemur til með að dvelja mikinn hluta dagsins í leikskólanum, er mikilvægt að góð samvinna og traust skapist milli foreldra og starfsfólks. Gott upplýsingaflæði þarf að eiga sér stað milli okkar til þess að dvöl barnsins í leikskólanum verði sem ánægjulegust. Upplýsingum til foreldra er komið á framfæri á vefsíðu skólans rnb.is/tjarnarsel Jafnframt viljum við hvetja ykkur til að kynnast leikskólalífinu af eigin raun, með því að gefa ykkur tíma til að setjast niður með okkur sem oftast.
6.1 Foreldrafundur
Foreldrafundir eru einu sinni til tvisvar á ári. Á þessum fundum er starfsemi leikskólans kynnt með fyrirlestrum og myndbandsupptökum af börnum í leik og starfi.
6.2 Foreldraviðtöl
Foreldraviðtöl eru einu sinni á ári, í afmælismánuði barnsins. Þá er foreldrum boðið upp á einkaviðtöl með starfsfólki deildarinnar. Einnig er gefinn kostur á viðtölum á öðrum tímum ef þörf krefur, t.d. vegna hegðunarvandamála eða þroskafrávika.
6.3 Fréttabréf
Fréttabréf kemur út a.m.k. fjórum sinnum á ári . Þar miðlum við upplýsingum til foreldra er varðar starfsemi leikskólans.
6.4 Upplýsingar um hópastarf
Upplýsingar um hópastarf hanga uppi í fataklefum fyrir foreldra. Þar kemur fram það sem gert var í hópastarfi þann daginn.
6.5 Dagatal leikskólans
Foreldrar fá afhent dagatal leikskólans í september fyrir haustönnina og í janúar fyrir vor- og sumarönn.
7. Foreldrafélag Tjarnarsels
Foreldrafélag starfar við leikskólann. Í stjórn þess eiga sæti sex fulltrúar frá foreldrum ásamt einum fulltrúa frá starfsfólki. Foreldrafélagið hefur m.a. staðið fyrir leikhúsferð, sveitaferð, jólaballi og sölusýningu á verkum barnanna á sumarhátíðinni. Foreldrar verða sjálfkrafa meðlimir foreldrafélagsins þegar barnið byrjar í leikskólanum. Félagsgjaldið er 1800 kr. á ári og er innheimt með gíróseðlum.
8. Lokaorð
Við í leikskólanum Tjarnarseli vonumst til að eiga gott og gæfuríkt samstarf við foreldra og að leikskóladvöl barnsins verði ánægjuleg og lærdómsrík.